TARI MASKOT SARASWATI NATHA KEANGGEN SARANA NGELESTARIANG BUDAYA BALI

TARI MASKOT SARASWATI NATHA KEANGGEN SARANA NGELESTARIANG BUDAYA BALI

(SMAN1Tampaksiring, MA’TAKSU). SMA Negeri Satu Tampaksiring inggih punika sekolah menengah atas sané magenah ring Désa Manukaya Anyar, Kecamatan Tampaksiring. SMA Negeri Satu Tampaksiring utawi sané ketah kasengguh TAKSU kasub pisan antuk kebudayaannyané, silih tunggil utsaha SMA Negeri Satu Tampaksiring sajeroning nglestariang budaya Bali inggih punika ngripta tari maskot. Tari maskot inggih punika silih tunggil wangun igelan sané nyihnayang rasa bangga miwah identik manados ikon sané nyihnayang kawéntenan daérah utawi genah. Tari maskot puniki kagambar ring wangun tari kreasi inggih punika wangun igelan sané geranyané mawit saking gerak-gerik tari tradisional sané sampun wénten. Wastan tari maskot SMA Negeri Satu Tampaksiring inggih punika Tari Saraswati Natha. Minab igelan puniki kantun asing kapiragi olih kramané santukan kantun arang kauningin olih kramané.

     Gambar Tari Saraswati Natha

     Sumber: https://youtu.be/XIut5LDZrNg?si=NlsBXQmu5GyW-2uq

Tari Saraswati Natha kaambil saking kalih kruna inggih punika “Saraswati” sané mateges Kediatmikan miwah “Natha” sané mateges Raja, punika mawinan prasida kasimpulang yéning Saraswati Natha mateges Raja saking Kediatmikan . Manut saking sumber bacaan https://www.wisdomlib.org yéning kaambil artos saking basa Sansekerta “Saraswati” Tegesnyané sané mamargi terus-terusan, miwah kruna “Natha” madué artos pamimpin. Manut Bapa Déwa Gede Ngurah Semarabawa, S.Pd pinaka Waka Kesiswaan miwah guru pengempu mata pelajaran seni budaya utaminnyané seni tari taler pangripta saking sasolahan Saraswati Natha Tari Saraswati Natha wantah wentuk pemujaan miwah rasa suksma majeng ring Ida Sang Hyang Widhi Wasa sané difokuskan ring aspek Déwi Saraswati utawi simbol widya (ilmu pengetahuan) sané kapicayang ring iraga mangda iraga bebas saking awidya. Sasolahan puniki kapertama karipta duk warsa 2015 tur langsung karesmiang tur katarikan duk warsa punika, tepatnyané duk tanggal 20 Oktober 2015 ri tatkala perayaan ulang tahun SMA Negeri 1 Tampaksiring, ri kala punika taler tari puniki kasayagayang olih Bupati Gianyar pinaka tari kebesaran TAKSU.

            Salanturnyané narasumber pinaka koordinator miwah pembina ekstra kurikuler tari nyihnayang indik proses nyipta igelan puniki nénten ja doh mabinayan sareng proses nyipta tari kreasi sané lianan sané prosesnyané kakawitin antuk ngrereh tema. Tema sané kaanggén ring sasolahan puniki inggih punika tema literal santukan gerakan saking igelan puniki madaging pesan khusus inggih punika wangun pemujaan ring Dewi Saraswati pinaka Dewi ilmu pengetahuan. Risampuné téma kasuksmannyané katentuang, proses nyiptaang igelan puniki nglantur nuju tahap selanturnyané inggih punika ngrereh réfrensi, makarya sinopsis, makarya pola lantai, ngrangkepi gerak, nguahin karakter, ngrereh penari, nguahin musik pengiring, miwah ngrereh kostum. Musik pengiring saking tarian Saraswati Natha karipta olih Made Yoga Semadi,S.Sn sane mawit saking Tegalalang. Lan anggén ngaryanin kostum Bapak Ngurah milih penata kostum sané mawit saking Singapadu.

            Sesolahan puniki ketahnyané kasolahang ring SMA Negeri Satu Tampaksiring ring acara-acara sekolah tertentu, sakéwanten nénten nulak kawéntenan tari puniki pacang kasolahang ring genah tiosan. Tari Saraswati Natha kagambel olih limang pragina putri, nénten wénten syarat khusus anggén igelan puniki, para pragina wantah patut prasida ngigel igelan sané kabakta. Musik pengiring saking igelan puniki kaplalinin olih Kerawitan TAKSU nganggén piranti musik gamelan.

            Kawéntenan igelan Saraswati Natha wantah kawéntenan wangunan sané kaanggén, tari puniki nganggén rebab pinaka wangunannyané. Sekadi sane sampun kauningin arang pisan wenten igelan sane nganggen rebab pinaka properti nanging Pak Ngurah pinaka pencipta igelan puniki prasida nyalanin properti sane kaanggen antuk gerakan sane kaanggen.

            Ring SMA Negeri Satu Tampaksiring, sasolahan Saraswati Natha pinaka tari kebanggaan santukan igelan puniki pinaka identitas sané nyihnayang keanekaragaman budaya saking SMA Negeri 1 Tampaksiring. Sasolahan Saraswati Natha kakaryanin olih Bapak Dewa Ngurah Semarabawa, S.Pd ring warsa 2015 sane sampun lintang. Gerakan igelan puniki maartos pemujaan miwah wujud rasa suksma ring manifestasi Ida Sang Hyang Widhi Wasa pinaka Dewi Saraswati sané pinaka Dewi ilmu pengetahuan antuk tatujon nunas ilmu pengetahuan miwah kabebasang saking ketambetan. Sasolahan puniki lumrahnyane kapentasang ring SMA Negeri Satu Tampaksiring ring acara-acara tertentu miwah kasarengin antuk gambelan sané kaplalinin olih Kerawitan TAKSU. Antuk kawéntenan igelan puniki kaaptiang prasida dados utsaha sajeroning nglestariang budaya Bali sané ring era puniki sampun ngawit kagingsirang antuk kawéntenan budaya asing sajabaning punika tari Saraswati Natha prasida dados wadah kreativitas sisya-siswi TAKSU sajeroning makarya. (        Ni Luh Wayan Asyawati - X1, MA’TAKSU)

(Ni Luh Wayan Asyawati/X1)

Artikel Lainnya :

• Garapan Cipta Karya Seni “Saraswati Natha” Membangun Karakter melalui Tarian
• (SMAN1Tampaksiring, MA
• Pentingnya Bulan Bahasa Bali demi Lestarinya Budaya di Bali
• TARI MASKOT SARASWATI NATHA KEANGGEN SARANA NGELESTARIANG BUDAYA BALI
• "Ngelaksanayan Kearifan Lokal: Kawentenang Bulan Bahasa Bali Risajebag Sekolahan ring Sewe